ရန်ကုန်မြို့ရှိ ဆီဒိုးနားဟိုတယ်အား စင်ကာပူလုပ်ငန်းစု Spring Blossom Ventures က ပိုင်ရှင်ဖြစ်သည့် စင်ကာပူကုမ္ပဏီ Keppel Land ထံမှ အမေရိကန်ဒေါ်လာ ၅၇ ဒသမ ၄ သန်းဖြင့် ဝယ်ယူရန် သဘောတူညီမှုရရှိခဲ့ကြောင်း သိရသည်။
ယင်းသို့ ဝယ်ယူလိုက်ခြင်းအတွက် အစုရှယ်ယာလွှဲပြောင်းရောင်းချမှုအား ၂၀၂၃ ခုနှစ် ပထမနှစ်ဝက်အတွင်း အပြီးသတ်ဆောင်ရွက်ရန် မျှော်လင့်ထားကြောင်း Spring Blossom ကုမ္ပဏီအမှုဆောင် အရာရှိချုပ် Low Heng Huat က ပြောသည်။
အဆိုပါ Spring Blossom ကုမ္ပဏီအနေဖြင့် ပြည်တွင်းတွင် ဟိုတယ်လုပ်ငန်းအား ဆက်လက်လုပ်ကိုင်သွားရန် ရည်ရွယ်ထားကြောင်း သိရသည်။
စင်ကာပူကုမ္ပဏီ Keppel Land ကမူ ဆီဒိုးနားဟိုတယ်(ရန်ကုန်)အား ရောင်းချခဲ့ခြင်းသည် ဖွံ့ဖြိုးတိုးတက်မှု အခွင့်အလမ်းများအား ဖော်ဆောင်ပေးနိုင်မည့် အစီအစဉ်များကြောင့်ဖြစ်ကြောင်းသတင်းထုတ်ပြန်ခဲ့သည်။
copy from sdtimedaily.
ကာကွယ်ဆေးတွေကို ပိုမို မျှမျှတတ ဖြန့်ဖြူးကြဖို့ WHO တိုက်တွန်း
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
ကိုရိုနာဗိုင်းရပ်စ် ကာကွယ်ဆေးတွေ ကမ္ဘာတစ်ဝန်းမှာ ပိုပြီး မျှမျှတတ ဖြန့်ဝေပေးဖို့ ကမ္ဘာ့ကျန်းမာရေးအဖွဲ့ (WHO) ရဲ့အကြီးအကဲက တောင်းဆိုလိုက်ပါတယ်။
ကိုရိုနာဗိုင်းရပ်စ် ကပ်ရောဂါအပေါ် နိုင်ငံတကာနဲ့ သက်ဆိုင်တဲ့ ပြည်သူ့ကျန်းမာရေး အရေးပေါ်အခြေအနေအဖြစ် ကြေညာခဲ့ပြီး တစ်နှစ်နီးပါး ဖြစ်တဲ့ သောကြာနေ့မှာ WHO ရဲ့ ညွှန်ကြားရေးမှူးချုပ် Tedros Adhanom Ghebreyesus က အဲဒီ မေတ္တာရပ်ခံချက်ကို ထုတ်ပြန်ခဲ့ပါတယ်။
ကိုရိုနာဗိုင်းရပ်စ်ကာကွယ်ဆေး စတင်နေပြီဖြစ်တဲ့ နိုင်ငံတွေအနေနဲ့ ကျန်းမာရေးဝန်ထမ်းတွေနဲ့ သက်ကြီးရွယ်အိုတွေကို ပထမဦးဆုံး ကာကွယ်ဆေးထိုးခွင့်ရအောင် သေချာစေဖို့ မစ္စတာ Tedros က တောင်းဆိုခဲ့ပါတယ်။ ဒါ့အပြင် ဆင်းရဲတဲ့နိုင်ငံတွေနဲ့ ဖွံ့ဖြိုးဆဲနိုင်ငံတွေအတွက် ကာကွယ်ဆေးတွေ ပိုမိုရရှိစေဖို့ ရည်မှန်းထားတဲ့ COVAX စီမံချက်ကို ပိုလျှံနေတဲ့ဆေးတွေ လှူဒါန်းကြဖို့ကိုလည်း သူက တိုက်တွန်းခဲ့ပါတယ်။
အခုလက်ရှိမှာတော့ ကာကွယ်ဆေးထိုးမှုတွေကို ဖွံ့ဖြိုးပြီးနိုင်ငံတွေမှာပဲ အဓိက ပြုလုပ်နေကြပါတယ်။ မစ္စတာ Tedros က “ကျွန်တော်တို့အနေနဲ့ ဒီကပ်ရောဂါကို နေရာတိုင်းမှာ အဆုံးသတ်နိုင်တဲ့ အချိန်ရောက်မှသာ ကမ္ဘာတစ်ဝန်းလုံးမှာ အဆုံးသတ်နိုင်မယ်” လို့ဆိုပြီး နိုင်ငံတကာက ပူးပေါင်းဆောင်ရွက်ကြဖို့ တောင်းဆို လိုက်ပါတယ်။
အုတ်ဖိုမြို့နယ်၌ အချိန်အခါမဟုတ် မိုးရွာသွန်းပြီး လေပြင်းတိုက်ခတ်၍ လူနေအိမ်များ အမိုးလန်ခြင်းနှင့်ပြိုလဲမှုများဖြစ်ပွား
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်အတွင်း ဇန်နဝါရီ (၃၀) ရက် မွန်းလွဲ (၃) နာရီခွဲခန့်က ရပ်ကွက် (၂)ရပ်ကွက်နှင့် ကျေးရွာအုပ်စု (၁၃)အုပ်စုတို့တွင် အချိန်အခါမဟုတ် မိုးရွာသွန်းပြီး လေပြင်းတိုက်ခတ်မှုကြောင့် လူနေအိမ်များ အမိုးလန်ခြင်းနှင့် ပြိုလဲမှုများဖြစ်ပွားခဲ့ကြောင်း သိရသည်။
အဆိုပါ ဖြစ်စဉ်ကြောင့် အမိုးလန်နေအိမ် (၁၂၂)လုံး၊ အမိုးလန် စာသင်ကျောင်း (၁)ကျောင်း၊ ပြိုလဲနေအိမ် (၆)လုံး၊ စာသင်ကျောင်း (၁)ကျောင်း ပြိုလဲခဲ့ကြောင်းနှင့် လူနှင့်တိရစ္ဆာန် ထိခိုက်သေဆုံးမှုမရှိကြောင်း သိရသည်။
အိန္ဒိယခေါင်းဆောင်ကြီး မဟတ္တမဂန္ဒီ ကွယ်လွန်ခြင်း ၇၃နှစ်ပြည့်ကျင်းပ
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
အိန္ဒိယနိုင်ငံရဲ့ခေါင်းဆောင်ကြီး မဟတ္တမဂန္ဒီ ကွယ်လွန်ခြင်း ၇၃နှစ်ပြည့်ကို မနေ့ကကျင်းပခဲ့ပြီး သမ္မတရမ်နက်ကိုဗင့် ဦးဆောင်တက်ရောက်ခဲ့ပါတယ်။ မဟတ္တမဂန္ဒီကို အိန္ဒိယမှာတော့ ဘာပူလို့သိကြပြီး လွတ်လပ်ခြင်းအတွက် တိုက်ပွဲဝင်သူ အိန္ဒိယတိုးတက်ဖို့ အသက်နဲ့ရင်းပြီး ပေးဆပ်ခဲ့သူအဖြစ် ယနေ့ထက်တိုင် အောက်မေ့သတိရနေကြဆဲလည်း ဖြစ်ပါတယ်။ Raj Ghat က အောက်မေ့ဖွယ်အထိမ်းအမှတ်နေရာမှာ ကျင်းပတဲ့ဒီပွဲကို အစိုးရအဖွဲ့အရာရှိကြီးများလည်း တက်ရောက်ခဲ့ကြကြောင်း သိရပါတယ်။
Source – AVN
we copy from MRTV
ဇန်နဝါရီလအတွင်း ဗီယက်နမ်သို့ နိုင်ငံခြားတိုက်ရိုက်ရင်းနှီးမြှုပ်နှံမှု
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
ဗီယက်နမ်နိုင်ငံရဲ့ ဇန်နဝါရီလအတွင်း နိုင်ငံခြားတိုက်ရိုက်ရင်းနှီးမြှုပ်နှံမှုက ဒေါ်လာ၂.၀၂ဘီလီယံထိရှိခဲ့ပြီး ဒီထဲမှာ စီမံကိန်းသစ်များပါဝင်ပါတယ်။ မနှစ်ကနဲ့ယှဉ်ရင်တော့ ၃၇%ထိ တိုးတက်မှုရှိခဲ့တာဖြစ်ပါတယ်။ ဘက်လွေက LNGစီမံကိန်းကနေမှ FDIစီးဆင်းမှုက မနှစ်ကထက်ကို တိုးတက်မှုရှိခဲ့တာလည်း ဖြစ်ပါတယ်။ ယခုလမှာလည်း စက်မှုလုပ်ငန်း ၁၄ခုမှာ နိုင်ငံခြားရန်ပုံငွေ၊ ထုတ်လုပ်မှုနဲ့ ၊ လုပ်ငန်းလည်ပတ်မှုများကို ပမာဏများများရရှိစေဖို့ ရည်မှန်းထားပြီး စင်ကာပူကတော့ ဗီယက်နမ်မှာ အများဆုံးရင်းနှီးမြှုပ်နှံသူဖြစ်ကာ ဇန်နဝါရီလအတွင်း အမေရိကန်ဒေါ်လာ သန်း၆၈၀ထိ ရှိခဲ့တာလည်း ဖြစ်ပါတယ်။
Source – AVN
we copy from MRTV
အပြည်ပြည်ဆိုင်ရာမြန်မာလေကြောင်းက မှာယူထားသည့် လေယာဉ်အသစ် ရောက်ရှိ
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
နိုင်ငံတကာလေကြောင်းလိုင်းများ ပြန်လည်ဖွင့်လှစ်ပါက နိုင်ငံတကာသို့ ပျံသန်းပြေးဆွဲနိုင်ရန်အတွက် အပြည်ပြည်ဆိုင်ရာ မြန်မာလေကြောင်း(MAI) က မှာယူထားသည့် Airbus A320-214 XY-ALL လေယာဉ်အသစ်သည် ယမန်နေ့က ရန်ကုန်အပြည်ပြည်ဆိုင်ရာလေဆိပ်သို့ ရောက်ရှိလာသည်။
MAI လေကြောင်းလိုင်းသို့ ထပ်မံဖြည့်တင်းရောက်ရှိ လာသည့် ယင်းလေယာဉ်အသစ်အား ရန်ကုန်အပြည်ပြည် ဆိုင်ရာလေဆိပ်တွင် လေကြောင်းလိုင်းမှ တာဝန်ရှိသူများ က Water-salute အခမ်းအနားပြုလုပ်၍ ကြိုဆိုခဲ့ပြီး အဆိုပါလေယာဉ်အသစ်ကို နယ်သာလန်နိုင်ငံမှ မြန်မာနိုင်ငံသို့ Ferry Flight အဖြစ် ပျံသန်းမောင်းနှင်ပေးခဲ့သော လေယာဉ်မှူးများအား လေယာဉ်မယ်များက ပန်းစည်းများပေးအပ်၍ ကြိုဆိုနှုတ်ဆက်ကြသည်။
Airbus A320-214 XY-ALL လေယာဉ်ကို ပြင်သစ်နိုင်ငံတွင် ထုတ်လုပ်ပြီး Manufacturing Serial Number မှာ MSN-4758 ဖြစ်ကာ Business Class ထိုင်ခုံ ရှစ်ခုံနှင့် Economy Class ထိုင်ခုံ ၁၆၂ ခုံပါရှိပြီး စုစုပေါင်းခရီးသည် (၁၇၀) ကို တင်ဆောင်ပျံသန်းနိုင်မည်ဖြစ်သည်။
ထို့ပြင် အပြည်ပြည်ဆိုင်ရာမြန်မာလေကြောင်း (MAI) သည် Safety နှင့် Operations ပိုင်းဆိုင်ရာတွင် နိုင်ငံတကာလေကြောင်း အဖွဲ့အစည်းများဖြစ်သည့် ICAO၊ IATA တို့၏ သတ်မှတ်စံချိန် စံနှုန်းများနှင့်အညီ ကိုက်ညီမှုရှိသည့်အပြင် လေကြောင်းလိုင်း စတင်တည်ထောင်ကတည်းက Accident များ တစ်ကြိမ်တစ်ခါမျှ ဖြစ်ခဲ့ခြင်းမရှိသဖြင့် IOSA လက်မှတ်ကို မြန်မာနိုင်ငံတွင် ပထမဆုံးရရှိခဲ့သည့် လေကြောင်းလိုင်း ဖြစ်သည့်အပြင် နိုင်ငံတကာခရီးစဉ်များ ပြေးဆွဲနေသည့် မြန်မာလေကြောင်းလိုင်းများအနက် တစ်ခုတည်းသော IOSA လက်မှတ်ရရှိထားသော လေကြောင်းလိုင်းလည်းဖြစ်သည်။
ကိုဗစ်-၁၉ ကပ်ရောဂါဖြစ်ပွားနေသည့် ကာလ ဖြစ်သော်လည်း အပြည်ပြည်ဆိုင်ရာ မြန်မာလေကြောင်း (MAI) သည် IOSA ၏ Remote Audit စစ်ဆေးခြင်းကို ဇန်နဝါရီ (၁၅) ရက်တွင် ထပ်မံအောင်မြင်ခဲ့ပြီးဖြစ်၍ ICAO ၏ Standard နှင့်အညီ IATA ၏ Member ဖြစ်သော IOSA လက်မှတ်ရ Operator အဖြစ် ဆက်လက်ရပ်တည်လျက်ရှိသည်။
ထို့ကြောင့် အပြည်ပြည်ဆိုင်ရာမြန်မာလေကြောင်း (MAI) က ပျံသန်းပြေးဆွဲမည့် ပြည်တွင်း၊ ပြည်ပ ခရီးစဉ်တိုင်းကို Operations ပိုင်း Safety အရ ခရီးသွား ပြည်သူများ ယုံကြည်စိတ်ချစွာစီးနင်းနိုင်မည်ဖြစ်ကြောင်း သိရသည်။
ဗီဇပြောင်းကိုရိုနာဗိုင်းရပ်စ်အမျိုးအစား သုံးမျိုးအပေါ် ကမ္ဘာ့ကျန်းမာရေးအဖွဲ့ သတိပေးချက်ထုတ်ပြန်
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
ကမ္ဘာ့နိုင်ငံအများအပြားတွင် ကူးစက်ပျံ့နှံ့လျက်ရှိသည့် ဗီဇပြောင်းကိုရိုနာဗိုင်းရပ်စ်အမျိုးအစား သုံးမျိုးအပေါ် ကမ္ဘာ့ကျန်းမာရေးအဖွဲ့က သတိပေးချက်တစ်ရပ် ယမန်နေ့တွင် ထုတ်ပြန်ခဲ့သည်။
ဗြိတိန်နိုင်ငံတွင် တွေ့ရှိခဲ့သည့် ဗီဇပြောင်းကိုရိုနာဗိုင်းရပ်စ်သည် နိုင်ငံပေါင်း (၆၉) နိုင်ငံသို့ ကူးစက်ပျံ့နှံ့လျက်ရှိကြောင်း ကမ္ဘာ့ကျန်းမာရေးအဖွဲ့က သတိပေးပြောကြားခဲ့သည်။
အဆိုပါ ဗီဇပြောင်းကိုရိုနာဗိုင်းရပ်စ်သည် အရှေ့အလယ်ပိုင်း၊ အာရှ၊ အမေရိကတိုက်ရှိ နိုင်ငံများနှင့် ဥရောပတစ်ဝန်းသို့ ကူးစက်ပျံ့နှံ့လျက်ရှိကြောင်း အဆိုပါထုတ်ပြန်ချက်တွင် ပါရှိသည်။
အလားတူ တောင်အာဖရိကတွင် တွေ့ရှိခဲ့သည့် ဗီဇပြောင်းကိုရိုနာဗိုင်းရပ်စ်သည် နိုင်ငံပေါင်း (၂၅) နိုင်ငံသို့ ကူးစက်ပျံ့နှံ့လျက်ရှိပြီး အဆိုပါနိုင်ငံများတွင် ကနေဒါ၊ ပြင်သစ်၊ ဗြိတိန်၊ သြစတြေးလျ၊ တရုတ်နှင့် ဂျပန်နိုင်ငံတို့လည်း ပါဝင်ကြောင်း သိရသည်။
ဘရာဇီးနိုင်ငံတွင် တွေ့ရှိခဲ့သည့် ဗီဇပြောင်းကိုရိုနာဗိုင်းရပ်စ်သည် အီတလီ၊ ဗြိတိန်၊ အမေရိကန်နိုင်ငံတို့ အပါအဝင် နိုင်ငံပေါင်း ရှစ်နိုင်ငံသို့ ကူးစက်ပျံ့နှံ့လျက်ရှိကြောင်း အဆိုပါ ထုတ်ပြန်ချက်တွင် ဖော်ပြထားသည်။
အဆိုပါ ဗီဇပြောင်းကိုရိုနာဗိုင်းရပ်စ်သုံးမျိုးအပေါ် ကာကွယ်ဆေးများ ထိရောက်မှု ရှိ/မရှိနှင့် ပတ်သက်ပြီး သုတေသနလုပ်ငန်းများ ဆောင်ရွက်လျက်ရှိသည်။
ကိုဗစ်-၁၉ ရောဂါအပြင် ဗီဇပြောင်းဗိုင်းရပ်စ်ကူးစက်မှုများ မြင့်မားလာသည့်အတွက် ကမ္ဘာ့ပြည်သူများအနေဖြင့် ဗိုင်းရပ်စ်ကာကွယ်ရေးဆိုင်ရာ စည်းမျဉ်းများကို ဆက်လက်လိုက်နာကြရန် ကမ္ဘာ့ကျန်းမာရေးအဖွဲ့က တိုက်တွန်းပြောကြားခဲ့သည်။
နယ်သာလန်အာလူးမျိုး စမ်းသပ်စိုက်ပျိုးမည်
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
အာလူးကြော်လုပ်ငန်းအတွက်လိုအပ်နေသည့် အားလူးကုန်ကြမ်းရရှိနိုင်ရန်အတွက် ယခုနှစ်တွင် နယ်သာလန်အားလူးမျိုးကို စမ်းသပ်စိုက်ပျိုးသွားမည်ဖြစ်ကြောင်း ရှမ်းပြည်နယ်(တောင်ပိုင်း) နောင်တရားအာလူးအသင်းထံမှ သိရပါသည်။ မြန်မာနိုင်ငံတွင် စားသုံးရန်အတွက် အာလူးထွက်ရှိမှု လုံလောက်မှုရှိသော်လည်း အာလူးကြော်လုပ်ငန်းများအတွက်မူ အာလူးကုန်ကြမ်း လိုအပ်ချက်ရှိနေဆဲဖြစ်သည့်အတွက် နယ်သာလန်အားလူးမျိုးကို တင်သွင်းစမ်းသပ်စိုက်ပျိုးရန် လုပ်ဆောင်ရခြင်းဖြစ်ကြောင်း နောင်တရားအာလူးအသင်းမှ ဥက္ကဋ္ဌ ဉီးခွန်ဆန်းဉီး၏ ပြောကြားချက်အရ သိရပါသည်။
မြန်မာနိုင်ငံတွင် ကိုဗစ်-၁၉ ကာကွယ်ဆေး ပထမဦးဆုံး စတင်ထိုးနှံခြင်း အစီအစဉ် သတင်းထုတ်ပြန်ချက်
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
နေပြည်တော်၊ ဇန်နဝါရီလ (၂၇)
ကိုဗစ်-၁၉ ကာကွယ်ဆေးကို မြန်မာနိုင်ငံတွင် (၂၇-၁-၂၀၂၁) ရက်နေ့မှ စတင်၍ ထိုးနှံသွားမည် ဖြစ်ပါသည်။ မြန်မာနိုင်ငံသည် ကိုဗစ်-၁၉ ကာကွယ်ဆေးရရှိရန် COVAX facility သို့ အဆိုပြုခြင်း၊ နိုင်ငံတော်အစိုးရဘဏ္ဍာငွေဖြင့် ဝယ်ယူခြင်း၊ နိုင်ငံအစိုးရအချင်းချင်း ချစ်ကြည်ရေးအစီအစဉ်ဖြင့် လက်ခံရရှိခြင်းစသည့် နည်းလမ်းများဖြင့် အရည်အသွေးမြင့်မား၍ လုံခြုံစိတ်ချရသော ကာကွယ်ဆေးများကို ရရှိရန် ကြိုးပမ်းခဲ့ပါသည်။
အိန္ဒိယနိုင်ငံအစိုးရမှ မြန်မာနိုင်ငံသို့ အိမ်နီးချင်းနိုင်ငံအချင်းချင်း ချစ်ကြည်ရင်းနှီးမှုဖြင့် ပေးအပ်သော COVISHIELD / Astrazeneca ကာကွယ်ဆေး အရေအတွက် (၁.၅)သန်းကို (၂၀၂၁) ခုနှစ်၊ ဇန်နဝါရီလ (၂၂) ရက်နေ့တွင် လက်ခံရရှိထားပြီး ဖြစ်ပါသည်။
နိုင်ငံတော်ဘဏ္ဍာငွေဖြင့် COVISHIELD / Astrazeneca ကာကွယ်ဆေး အကြိမ် (dose) အရေအတွက် သန်း(၃၀)ကို ဝယ်ယူထားပြီးဖြစ်ကာ (၂၀၂၁) ခုနှစ်၊ ဖေဖော်ဝါရီလ၊ ပထမအပတ်အတွင်း ကာကွယ်ဆေးအကြိမ်ရေ (၂) သန်းခန့် ကနဦးရောက်ရှိလာမည်ဖြစ်ပါသည်။ COVAX facility မှ ကာကွယ်ဆေးများသည် မတ်လတွင် စတင်၍လည်းကောင်း၊ နိုင်ငံတော်ဘဏ္ဍာငွေဖြင့် ဝယ်ယူထားသော ကာကွယ်ဆေးများသည် ဧပြီလတွင်လည်းကောင်း လစဉ် အသုတ်လိုက် ဆက်လက်ရရှိသွားမည် ဖြစ်ပါသည်။
ကိုဗစ်-၁၉ ကာကွယ်ဆေးထိုးနှံခြင်းကို ကိုဗစ်-၁၉ ရောဂါကာကွယ် ထိန်းချုပ်ရေးလုပ်ငန်းတွင် ရှေ့တန်းမှ တာဝန်ယူဆောင်ရွက်နေသော ကျန်းမာရေးဝန်ထမ်းများနှင့် စေတနာ့ဝန်ထမ်းများကို (၂၇-၁-၂၀၂၁) ရက်နေ့မှစတင်၍ ထိုးနှံပေးသွားမည်ဖြစ်ပြီး ပြည်သူ့လွှတ်တော်ကိုယ်စားလှယ်များကို (၂၉-၁-၂၀၂၁) ရက်နေ့တွင်လည်းကောင်း၊ အမျိုးသားလွှတ်တော်ကိုယ်စားလှယ် များနှင့် တပ်မတော်သားလွှတ်တော်ကိုယ်စားလှယ်များကို (၃၀-၁-၂၀၂၁) ရက်နေ့တွင်လည်းကောင်း ထိုးနှံပေးသွားမည် ဖြစ်ပါသည်။
ထို့နောက် နိုင်ငံတစ်ဝန်း ကိုဗစ်-၁၉ ကာကွယ်ဆေးထိုးနှံခြင်းလုပ်ငန်း ကို (၅-၂-၂၀၂၁) ရက်နေ့မှ စတင်ဆောင်ရွက်သွားမည်ဖြစ်ပြီး ပြည်ထောင်စု အဆင့်၊ တိုင်းဒေသကြီး/ ပြည်နယ်အဆင့် အစိုးရအဖွဲ့ဝင်များလည်း ပြည်သူနှင့် အတူ စတင်ထိုးနှံသွားမည် ဖြစ်ပါသည်။
ထိုသို့ထိုးနှံရာတွင် မိမိအိမ်တွင်နေထိုင်ရေးအစီအစဉ်(Stay at home) တွင် အကျုံးဝင်သော မြို့နယ်များ၌ နေထိုင်ပြီး အသက်ကြီးသူများ၊ အခြား ရောဂါအခံရှိသူများနှင့် ရောဂါရရှိမှုလွယ်သော လူအုပ်စုများကို ဦးစားပေးကာ ထိုးနှံပေးသွားမည်ဖြစ်ပါသည်။ ကာကွယ်ဆေးရရှိမှု အရေအတွက်အပေါ် မူတည်၍ Stay at home အစီအစဉ်တွင် အကျုံးဝင်သော မြို့နယ်များအနက် ကူးစက်ဖြစ်ပွားမှုများပြားသော မြို့နယ်များ၊ နေရာဒေသများကို ဦးစားပေး ရွေးချယ်ထိုးနှံပေးသွားမည် ဖြစ်ပါသည်။ ဆက်လက်ရရှိလာမည့် ကာကွယ်ဆေးအရေအတွက် အပေါ်မူတည်၍ ကျန်လူအုပ်စုများကိုလည်း ဦးစားပေးအစီအစဉ်အလိုက် ဆက်တိုက်ထိုးနှံပေး သွားမည် ဖြစ်ပါသည်။
“ကျွန်မတို့ ကျန်းမာရေးနှင့်အားကစားဝန်ကြီးဌာနကနေ သတ်မှတ်ထား တဲ့စည်းမျဉ်း၊ စည်းကမ်းတွေအတိုင်း ဆက်ပြီးတော့ မိမိကိုယ်မိမိ ကာကွယ်သွားရမှာ ဖြစ်ပါတယ်။ မျက်နှာဖုံးတပ်ရမယ်၊ လက်ဆေးရမယ်၊ လူစုလူဝေးကြားထဲမှာ မသွားရဘူး၊ ခပ်ခွာခွာနေရမယ် စသဖြင့်ပေါ့၊ ဒီအခြေခံစည်းမျဉ်း/စည်းကမ်းတွေကို ဆက်ပြီးတော့ လိုက်နာသွားဖို့ လိုပါတယ်။”
(နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ၂၁-၁-၂၀၂၁ ရက်နေ့တွင် ပြည်သူများသို့ အစီရင်ခံတင်ပြသည့် မိန့်ခွန်းမှ ကောက်နုတ်ချက်)
#Photo Credit- ဒေါက်တာအောင်မြင့်သူ၊ နေပြည်တော်ပြည်သူ့ဆေးရုံကြီး ခုတင်(၁၀၀၀)
we copy from MRTV
မြန်မာနိုင်ငံတွင် Covid-19 ကာကွယ်ဆေး COVISHIELD ပထမဆုံး စတင်ထိုးနှံသူ
နေပြည်တော် ပြည်သူ့ဆေးရုံကြီး ခုတင် (၁၀၀၀)မှ အထက်တန်းသူနာပြု မအေးမူမူ
‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗‗
နေပြည်တော်၊ ဇန်နဝါရီ (၂၇)
#Photo Credit- ဒေါက်တာအောင်မြင့်သူ၊ နေပြည်တော်ပြည်သူ့ဆေးရုံကြီး ခုတင်(၁၀၀၀)
